नाम जुराउने नयाँ तरिका ।

केही वर्ष पहिले सम्म बच्चा जन्मेपछि उ जन्मेको समय अनुसार नक्षत्रबाट नाम जुराएर न्वारानमा नाम राख्ने चलन थियो । शायद मेरो नाम पनि त्यसैगरी राखियो होला । टिकाराम  मो, टा, टि, टु पुर्वफाल्गुनी नक्षत्र सिंह राशी । सानो सानोमा वास्ता भएन.. तर अलि पछि मेरो नाम मैलाइ मन परेन । कस्तो नराम्रो नाम...। म एकान्तमा टोलाएर सोच्ने गर्थेँ । साथीहरुको कति राम्रा नाम..., मेरो भने टिका । के हो यस्तो टिका पनि नाम हुन्छ ? नामै फेर्न सकिन तरपनि मेरो रुची अनुरुपको उपनाम झुन्ड्याएँ "उत्सुक" । अझै पछि म मेरो नामको बारेमा अझै सोच्न थालेँ । कस्तो टिका...?? खासगरी टिका निधारमा लगाइन्छ । चाहे महिलाहरुले लगाउने रंगीविरंगी होस् वा चामलमा दही र रंग मिसाएर बनाएको अक्षता होस् । प्रायः सबै टिकाहरु रंगी विरंगी हुन्छन् । तर न मेरो नाम रंगीन भयो, न त जिन्दगी....

जिन्दगी रंगीन कसरी हुन्छ - फेरी अर्को प्रश्न तेर्सियो ।

शायद मेहनतले विभिन्न रंगहरु भर्दै जानुपर्छ होला... मैले कोशिस गर्दा गर्दै सकिन... । आजभोली बच्चा जन्मेपछि नाम राख्ने तरिका अलि भिन्न भएको छ । बच्चाको नाम राख्दा बाबु आमाको नाम मिलाएर राख्ने लहर चलेको छ । चर्चित गायक रामकृष्ण ढकालले आफ्नी छोरीको नाम राख्दा आफ्नो नामबाट रा तथा श्रीमतीको निलमबाट नी मिलाएर रानी ढकाल राखेका रे । मेरो एकजना मित्र पुष्प र उनकी श्रीमती तिलमाया पनि आफ्नो बच्चाको नाम कसरी राख्ने भन्ने बारेमा सल्लाह गर्दै थिए ।

अनि आफ्नो पहिलो बच्चाको नाम जुन अक्षरबाट शुरु हुन्छ त्यसपछिका बच्चाहरुको नाम पनि त्यहि अक्षरबाट राख्दै जाने, जस्तै : सरोज, सरिता... रमेश, रमिता, दिनेश, दिपक, दिपिका आदी ।
समय अझै अगाडी बढिसकेको छ... अब नाम जुराउने पण्डितहरु पात्रो हेरेर चिनामा हैन, डिक्सनरी हेरेर फेसबुकमा नाम जुराउँछन् । फेसबुकमा रहेका साथीहरुबाट कमेन्ट मार्फत नामहरुको तालिका बनाइन्छ अनि नोमिनेशनमा परेका नामहरुमाथी विशेष कमिटिको निर्णयबाट नाम र्सार्वजनिक गरिन्छ । अस्ति भर्खर मात्र मेरो एकजना मित्र रामप्रसादजीलाई पुत्रलाभ भएको छ । वहाँलाई पनि नाम के राख्ने भन्ने बारे यस्तै समस्या परेको छ । रामप्रसाद र विष्णुमायाको प्रथम पुत्ररत्नको नाम के जुराउने... फेसबुकले कत्तिको सहयोग गर्छ हेरौँ ।